श्री राम

||श्री राम||

तुम्ही मानले मला आपुले शिष्य |

दिलात जणू पुनर्जन्म ||

कधीच न फिटे आपुले ऋण |

तारेल मला सदैव आपुले नाम ||१||

श्री महाराज श्री महाराज हाकारे मन माझे |

मानसपूजेमध्ये सदा लीन व्हावे वाटे ||

अखंड रामनाम दिलेत तुम्ही ताराया |

करू दे भक्ती तुमची हा वर द्यावा कृपया ||२||

असंख्यात भक्तजन जपती रामनाम |

मज पामराचा तिथे काय भला पाड ||

तरीही कृपा मजवरी झाली अपरंपार |

या कृपेला करुणानिधे करी मज सत्पात्र ||३||

निडारले नयन श्रींची करुणमूर्ती न्याहाळता |

गुरुचरणी अखंड असो नमिलेला माझा माथा ||

सद्गुरू-शिष्य नाते हे जन्म-जन्मांतरीचे |

भक्तीत बुडून जावे, नामसागरात फैलावे वाटे ||४||

विवेक आणि वैराग्य दोनही सहज घडती |

सद्गुरूंचे रामनाम सदा देतसे प्रचीती ||

प्रपंची राहोन परमार्थ करावा वचन असे नेमस्त |

महाराजांची दास मी केली प्रतिज्ञा हृदयस्थ ||५||

|| श्री राम जय राम जय जय राम ||